Santa Ageda Aiurriren alde!
2024-01-17
KOPLA POLITA ESKAINI ZIOTEN URNIETAN AIURRIRI BERTAKO KOPLARIEK
Santa Ageda bezperan, otsailaren 4an, eguerdian ibili ziren Urnietako kaleetan barrena bertako koplariak, Agate deunari gorazarre egiten. Santari bere kopla eskaintza egiteaz gain, tartea izan zuten Aiurriren alde ere Santari eskatu eta gogoeta egiteko. Izan ere, Unai Gaztelumendi bertsolariak idatzitako kopla ederra kantatu zuten Urnietako plazan.
Idiazabal kalera jaitsita bere azkeneko saioa Zaldundegi etxekoei eskaini zieten, baita agur eta ohore egin ere, iragarri baitute aurtengo abuztuan itxiko dutela mendez mende zabalik egon den ostatu eta benta, Beterriko garrantzitsuenetakoa.
Halaxe dio koplak
Joan den urtearen amaieran Urnietako Udaleko gobernu taldearen partetik astekariak jasotako murrizketa hizpide izan zuten igande goizeko kalejiran. Hala, “Hain urri” abestiarekin elkartasuna erakutsi zioten tokiko komunikabideari, egoera gaitzestearekin batera:
Adarran bera tantaka zatoz
berri freskoen iturri
herria zure egarri baina
utzi zaituzte hain urri.
Eskera gatoz taldean
urritz makilak aldean
gure burua ikusi asmoz.
berriz zure azalean.
Neguko egun motzetan
otsaileko izotzetan
zure eskela jarri nahi dute
egunkari arrotzetan.
Adarran bera tantaka zatoz
berri freskoen iturri
herria zure egarri baina
utzi zaituzte hain urri.
Onddon emana bi pausu.
Onddin ikusi al nauzu?
Gero kalean zer gertatzen den
zuk kontatuko didazu.
Aballarri ta Adarra
Pardakin ilunabarra
postaria noiz etorriko den
zain dago baserritarra.
Adarran bera tantaka zatoz
berri freskoen iturri
herria zure egarri baina
utzi zaituzte hain urri.
Pago azpian pakea,
kalean borondatea,
baina zergatik dago itxita
udaletxeko atea?
Urtuko da mendi gaina
udaberriko usaina
kukua berriz etorriko da
xoxik ez daukagu baina.
Adarran bera tantaka doan
berri freskoen iturri
gure atea zuretzat beti
zabalik dago Aiurri!
Orain gutxi aurreratu genuen bezala. Urnietan bildutako dirua Aiurri hedabideari eman zioten Mantale Elkarteko kideek, 345,00 €. Mila esker laguntza eskaintzen ari zaigun urnietar orori!! Bereziki herriko gainerako elkarteei!!
Xoxak biltzeko maindirea Aiurriren irudi eta guzti!
Iruzkinik ez "Santa Ageda Aiurriren alde!"